Frábær frumsýning að baki

Síðastliðinn föstudag frumsýndum við Dagbók Önnu Frank við frábærar undirtektir. Það er alltaf mikil gleði sem fylgir því að deila afrakstri vinnu sinnar en margir koma að sýningunni á einn eða annan hátt. Spennan og tilhlökkunin í húsinu var áþreifanleg og má segja að við lok sýningar hafi ekki verið þurrt auga í húsi, bæði meðal áhorfenda og á sviðinu.

Dagbókin lýsir svo vel augnablikum og atriðum sem eru sitt á hvað sorgleg, ógnvekjandi og meira að segja sprenghlægileg þess á milli. Þessi kengimagnaða saga er áhrifamikil og svo einstaklega ótrúleg en trúanleg á sama tíma og erum við aðstandendur sýningarinnar afskaplega stolt af afrakstri okkar.

Leikritið er eftir uppfærðri leikgerð sem hefur aldrei áður verið sýnd á Íslandi, og fengum við Ingunni Snædal til að þýða hana fyrir okkur. Þessi uppfærða leikgerð inniheldur kafla sem voru ekki birtir í fyrstu útgáfu bókarinnar Dagbók Önnu Frank og gefa þeir nánari innsýn inn í hugarheim stúlkunnar, meðal annars neikvæðar tilfinningar hennar gagnvart móður sinni og uppgötvanir hennar á sjálfri sér í gegnum kynþroskann. Leikstjóri er Sigurður Líndal og nálgast hann efnið af einstakri nákvæmni og virðingu.

Dagbók Önnu Frank er tvímælalaust eitt mikilvægasta bókmenntaverk tuttugustu aldarinnar. Þegar nasistar náðu völdum í Evrópu varð fjöldi gyðingafjölskyldna að yfirgefa heimaland sitt. Þau sem ekki fóru úr landi urðu að fela sig. Þau sem ekki földu sig enduðu í útrýmingarbúðum þar sem þau voru myrt á eins skilvirkan hátt og hægt var. Þessi voðaverk eiga fáa sína líka í mannkynssögunni. En úr þessum jarðvegi, þessu þjóðarmorði, sprettur ein magnaðasta saga sem sögð hefur verið úr nokkru stríði; saga Önnu.

Sýningar verða í Freyvangi föstudags- og laugardagskvöld fram á vori og hægt er að panta miða í síma 857-5598 og á tix.is.

Frumsýning 21. febrúar

Um er að ræða uppfærða leikgerð og nýja þýðingu sem hefur aldrei verið sýnd hér á landi. Þessi nýja leikgerð inniheldur kafla sem voru ekki birtir í fyrstu útgáfu bókarinnar, Dagbók Önnu Frank, sem verkið er byggt á. Gefa þessir kaflar nánari innsýn inn í hugarheim stúlkunnar.

Dagbók Önnu Frank er tvímælalaust eitt mikilvægasta bókmenntaverk tuttugustu aldarinnar. Þegar nasistar náðu völdum í Evrópu varð fjöldi gyðingafjölskyldna að yfirgefa heimaland sitt. Þau sem ekki fóru úr landi urðu að fela sig. Þau sem ekki földu sig enduðu í útrýmingarbúðum þar sem þau voru myrt á eins skilvirkan hátt og hægt var. Þessi voðaverk eiga fáa sína líka í mannkynssögunni. En úr þessum jarðvegi, þessu þjóðarmorði, sprettur ein magnaðasta saga sem sögð hefur verið úr nokkru stríði; saga Önnu.

Fyrsta leikgerðin er eftir Albert Hackett og Frances Goodrich, kom út skömmu eftir að Dagbókin sjálf var gefin út og hefur verið leikin um heim allan síðan. Fyrir nokkrum árum var leikskáldið Wendy Kesselman fengin til að uppfæra leikgerð Hackett og Goodrich og var tilnefnd til Tony-verðlaunanna fyrir verkið

Mynd frá æfingu.

Á tíunda áratugnum var Dagbókin sjálf endurútgefin, um þrjátíu prósentum lengri en hún var í upphaflegu útgáfunni sem ritstýrt var af Ottó Frank og útgefendum bókarinnar. Efnið sem upphaflega fékk ekki að vera með í útgáfu dagbókarinnar snerist fyrst og fremst um uppgötvun Önnu á sjálfri sér sem kynveru, og um neikvæðar tilfinningar hennar í garð móður sinnar

Frumsýnt verður 21. febrúar og sýningar verða í Freyvangi föstudags- og laugardagskvöld fram á vor.

Leikstjóri er Sigurður Líndal og þýðandi er Ingunn Snædal.

Hægt er að panta miða í s. 857-5598 og á Tix.is

Leikara vantar

Freyvangsleikhúsið auglýsir eftir ungum mönnum, á aldrinum 15-20 ára, til að taka þátt á sviði í leikritinu Dagbók Önnu Frank.

Æfingar hefjast þessa helgina og er mikil tilhlökkun í fólkinu okkar fyrir þessu spennandi verkefni.

Leikritið segir frá þeim tveim árum sem Anna Frank, 13 ára hollensk gyðingastúlka, dvaldist í felum undan nasistum á hrörlegu háalofti í vöruskemmu í Amsterdam, ásamt foreldrum sínum, systur og fjórum öðrum gyðingum. Þennan tíma heldur Anna dagbók sem hún trúir fyrir tilfinningum sínum og því hvernig hún upplifir þennan tíma þar sem skiptast á skin og skúrir.

Leikstjóri er Sigurður Líndal Þórisson og þýðandi Ingunn Snædal.

Áhugasamir geta haft samband í síma 899 7689 (Anna) eða í netfang freyvangur@gmail.com





Freyvangsleikhúsið setur upp Dagbók Önnu Frank

Við hjá Freyvangsleikhúsinu sitjum ekki auðum höndum og erum nú þegar í startholunum fyrir næsta verkefni en eftir áramótin setjum við upp sýninguna Dagbók Önnu Frank.

Leikritið segir frá þeim tveim árum sem Anna Frank, 13 ára hollensk gyðingastúlka, dvaldist í felum undan nasistum á hrörlegu háalofti í vöruskemmu í Amsterdam, ásamt foreldrum sínum, systur og fjórum öðrum gyðingum. Þennan tíma heldur Anna dagbók sem hún trúir fyrir tilfinningum sínum og því hvernig hún upplifir þennan tíma þar sem skiptast á skin og skúrir.

Um er að ræða uppfærða leikgerð og nýja þýðingu sem hefur aldrei verið sýnd hér á landi. Þessi nýja leikgerð inniheldur kafla sem voru ekki birtir í fyrstu útgáfu bókarinnar, Dagbók Önnu Frank, sem leikritið er gert eftir. Gefa þessir kaflar nánari innsýn inn í hugarheim stúlkunnar.

Leikstjóri er Sigurður Líndal Þórisson og þýðandi Ingunn Snædal.

Áheyrnarprufur verða dagana 7. Og 8. Desember kl. 13:00 báða dagana. Skráning í prufur og fyrirspurnir sendist á freyvangur@gmail.com. Hvetjum við alla áhugasama um starfið til að láta sjá sig. Æfingar hefjast svo í byrjun janúar og frumsýnt verður í febrúar.

Hittumst heil!

Allra síðasti séns!

Nú er aðeins ein sýning eftir af gamanleikritinu Blúndur og blásýra!

Þessi drepfyndna sýning hefur aldeilis kitlað hláturtaugar áhorfenda í haust sem og okkar sem komum að sýningunni.

Ef þú hefur ekki séð Blúndur og blásýru nú þegar þá mælum við með að þið tryggið ykkur miða á lokasýninguna áður en það verður of seint.

Miðasala í síma 857 5598 og á tix.is

Sýning á föstudag felld niður.

Því miður verðum við að fella niður sýningu á Blúndum og blásýru næstkomandi föstudag, 22. nóvember.

Það þýðir að aðeins eru þrjár sýningar eftir af þessu frábæra gamanleikriti, en Blúndur og blásýra verður sýnt á laugardögum kl. 20, 23. nóv, 30. nóv og 7. des.

Ekki missa af þessari drepfyndnu sýningu og pantaðu miða í síma 857 5598 eða á tix.is.

Minningarsýning

Kæru vinir.

Þann 16. nóvember næstkomandi verður hin reglubundna Minningarsýning leikfélagsins, en þar heiðrum við þá félaga okkar sem eru fallnir frá.

Allur ágóði minningarsýninga fer í sjóð sem félagar Freyvangsleikhússins geta sótt styrki í fyrir námskeið tengd sviðslistum.

Hægt er að panta miða í síma 857 5598 og á tix.is

Hlökkum til að sjá sem flesta til að minnast með okkur þessa góða fólks og styrkja arfleið þeirra í leikhúsinu.

Frábær frumsýning að baki

Kæru vinir og félagar.

Í gærkvöldi frumsýndum við Blúndur og blásýru við alveg hreint frábærar viðtökur.

Mikil gleði var í húsinu, hjá hópnum okkar sem og áhorfendum og fannst okkur sem að þakið ætlaði af húsinu af hlátrasköllunum. Eftir 7 vikna ferli með yndislegum hóp er þetta bráðskemmtilega leikrit loksins komið í sýningu og er hópurinn okkar uppfullur af ást, hamingju og þakklæti til áhorfenda. Ríkir því mikil tilhlökkun í hópnum til að deila gleðinni með ykkur hinum.

Það eru en þá lausir miðar á sýninguna hjá okkur í kvöld sem og næstu helgar. Hægt er að panta miða í síma 857 5598 og á tix.is.

Takk fyrir kærlega fyrir okkur.

Hlökkum til að sjá þig og þína í leikhúsinu.

Frumsýning í kvöld!

Það er mikil tilhlökkun hjá okkur í dag en gamanleikritið Blúndur og blásýra í leikstjórn Völu Fannell verður frumsýnt kl. 20 í kvöld!

Margar hendur vinna létt verk og það er mjög kraftmikill hópur sem kemur að sýningunni, hvort sem á sviði eða utan þess og mikil gleði hefur ríkt í húsinu á þessu ferli og það er alltaf jafn ótrúlegt hvað flottur hópur getur áorkað miklu á stuttum tíma. En nú er komið að frumsýningu og hlakkar hópinn mikið til að skila árangri síðustu vikna til áhorfenda og leyfa öðrum að njóta.

Poj-poj! Tu-tu! og þrefalt húrra!

Hittumst heil, í leikhúsinu okkar.

Miðasalan er í fullum gangi, hægt er að panta miða í síma 857 5598 og á tix.is

Við kynnum til leiks: Guðjón

Hvað heitir þú? Guðjón Ólafsson

Hvað ertu gamall/gömul? 64

Hvað fékkstu þér í morgunmat? Ristað brauð og te

Hvern leikur þú í leikritinu Blúndur og blásýra? Rooney varðstjóra

Hvað finnst þér skemmtilegast við karakterinn þinn? Hvað hann á margt sameiginlegt með Adam nokkrum Hoskins.

Hefurðu einhvern leyndan hæfileika, og hver er hann? Allir mínir hæfileikar eru augljósir.

Guðjón

Hvað hefur þú stundað leiklist lengi? frá 1983

Hefurðu starfað með Freyvangsleikhúsinu áður? 

Hvað fékk þig til að fara út í leiklist? Mig vantaði eitthvað að gera og Litla Leikklúbbinn vantaði leikara.

Hvað viltu verða þegar þú verður „stór“? Eftirlaunaþegi

Hvað keyptirðu fyrir peningana sem Frúin í Hamborg gaf þér?    Flugmódel

Og að lokum…. Af öllum mótleikurum þínum, hver heldurðu að hafi stolið kökunni úr krúsinni í gær? Daði

Miðasala fyrir Blúndur og blásýru í Freyvangi er opin!

Hægt er að panta miða á tix.is og í síma 857-5598 kl. 14-17 alla virka daga.