freyvangur Fréttir

Frumsýning á föstudaginn

Það gengur mikið á í Himnaríki

 

Næstkomandi föstudag 17. febrúar kl. 20:00 verður; Himnaríki – geðklofinn gamanleikur, frumsýndur í Freyvangi. Undirbúningur hefur staðið yfir sleitulaust frá því laust eftir áramót og nú erum við loksins tilbúin að sýna áhorfendum afrakstur erfiðisins.

Sýningar verða kl. 20:00 á föstudögum og laugardögum. Miða er hægt að panta hér á síðunni með því að smella á flipann “Panta miða” eða með því að hringja í miðasölusíma 857 5598 milli kl. 17 og 19 alla daga. Utan þess tíma er hægt að skilja eftir skilaboð á símsvara.

Miðaverði er mjög stillt í hóf eða kr. 2.500,-.

1. sýning: 17. febrúar – uppselt

2. sýning: 18. febrúar

3. sýning: 24. febrúar

4. sýning: 25. febrúar

o.s.frv.

Hlökkum til að sjá ykkur öll.

freyvangur Uncategorized

Frumsýning nálgast á Himnaríki

Nú er farið að bera í bakkafullan heita pottinn!

Nú nálgast frumsýning á Himnaríki hér í Freyvangsleikhúsinu, 17. febrúar nánar tiltekið. Í tilefni af því birtum við tilkynningu á leiklist.is

Æfingar á aðalverkefni Freyvangsleikhússin, Himnaríki – geðklofinn gamanleikur, hófust strax eftir áramót en frumsýnt verður 17. febrúar n.k. Verkið var fyrst sett upp hjá Hafnarfjarðarleikhúsinu 1995 og naut strax mikilla vinsælda, en þess má geta að Leikfélag Ölfuss setti verkið upp nú á haustdögum við góðar undirtektir.

Höfundur verksins er Árni Ibsen sem er vel þekktur fyrir ýmis leikrit, s.s. Skjaldabakan kemst þangað líka, Afsakið! Hlé og Fiskar á þurru landi. Árni hlaut ýmsar viðurkenningar fyrir ritstörf sín og þýðingar um ævina en hann lést 21. ágúst 2007, 59 ára gamall. Leikstjóri uppsetningarinnar er Jón Gunnar Þórðarson sem er að góðu kunnur fyrir leikstjórn bæði hjá áhugaleikfélögum og atvinnuleikhúsum en hann hefur m.a. leikstýrt Með fullri reisn hjá Leikfélagi Hörgdæla og Rocky Horror hjá Leikfélagi Akureyrar.

Með hlutverk fara Brynjar Gauti Schiöth sem sló rækilega í gegn í Svejk, Hildur Axelsdóttir sem fyrst sló í gegn sem Ronja ræningjadóttir, Inga María Ellertsdóttir sem sló í gegn í Rocky Horror, Jóhann Axel Ingólfsson sem sló eftirminnilega í gegn sem asninn í Kardimommubænum, Ólöf Huld Matthíasdóttir sem slær í gegn hvar sem hún kemur og Steingrímur Magnússon sem hefur slegið í gegn bæði sem Borkaræningi og indíáni, auk þess að slá í gegn í Svejk.

Leikritið gerist í sumarbústað og er leikið á tveimur sviðum í einu. Búið er að skipta stóra salnum í Freyvangi upp í tvo minni og skipta áhorfendur um sal í hléi og sjá þannig bæði það sem á sér stað inni í sumarbústaðnum og hitt sem gerist utan dyra.

Tilkynninguna má líka lesa á leiklist.is

freyvangur Fréttir

Síðasti séns að kaupa gjafabréf á Himnaríki – geðklofinn gamanleik

Í sumarbúastaðaferðum er hefð að kveikja upp í grillinu

 

Freyvangsleikhúsið vekur athygli á að enn er hægt að fá gjafabréf á Himnaríki – geðklofinn gamanleik í Eymundsson.

Fram til 5. febrúar er hægt að kaupa gjafabréf sem kosta 2.000,- kr. en almennt miðaverð er 2.500,- kr.

Hægt er að kaupa miða hér á síðunni undir flipanum Panta miða og í miðasölusíma 857-5598 milli 17 – 19 alla daga.

Hlökkum til að sjá ykkur í leikhúsinu.

freyvangur Fréttir

Búið að opna fyrir miðasölu

Nú er hægt að fara að kaupa miða á Himnaríki – geðklofinn gamanleik.

Við bjóðum upp á fjölbreytt úrval miðakaupaaðferða:

  1. Hægt er að smella hér og fara eftir leiðbeiningunum.
  2. Hægt er að smella á flipann “Panta miða” hér að ofan og panta miða þar.
  3. Hægt er að senda póst á freyvangur@gmail.com og panta miða.
  4. Hægt er að hringja í miðasölusímann 857 5598 milli kl. 17 og 19 alla daga. Utan þess tíma er hægt að skilja eftir skilaboð á símsvara.
  5. Hægt er að rölta sér í Eymundsson og kaupa gjafabréf á afslætti til 5. febrúar.