Freyvangsleikhúsið

Freyvangsleikhúsið vill óska landsmönnum öllum árs og friðar. Við þökkum sérstaklega öllum þeim sem lagt hafa leið sína í Freyvangsleikhúsið á liðnu ári og vonumst til að sjá sem flest ykkar aftur á komandi ári. Einnig þökkum við ósérhlífið starf allra þeirra sem lagt hafa hönd á plóginn í starfsemi Freyvangsleikhússins fram að þessu og hlökkum til að njóta krafta ykkar í framtíðinni.

Fyrsti samlestur á söng- og dansleiknum Vínland eftir Helga Þórsson verður í Freyvangi á morgun, sunnudag 23. nóvember, kl. 13:00. Allir hvattir til að mæta.

Áheyrnarprufur. Söngvarar og leikarar óskast!
Laugardaginn 22.11. frá 13:00 – 16:00 verða opnar söngprufur fyrir söngleikinn Vínland í Freyvangi. Allir sem geta sungið og leikið eru velkomnir. Ingólfur Jóhannsson mun sitja við píanóið og spila undir lög að vali þátttakenda. Leikstjórinn, Ólafur Jens Sigurðsson, verður að sjálfsögðu á staðnum. Æfingartíminn verður í janúar og fram að frumsýningu um miðjan febrúar.

Vínland er fjölmennur söngleikur eftir Helga Þórsson sem gerist á tímum víkinga meðal norrænna manna á Grænlandi og svo færist sögusviðið yfir til Vínlands í Ameríku. Sagan fjallar um; ástir og örlög, kristni og heiðni, víkinga og indjána, gleði og sorgir en umfram allt mennskuna sem alltaf er söm við sig í gegnum allar aldir.

Tónlistina mætti kalla því markvissa nafni popp. Allt frá hugljúfum ballöðum fyrir krúttin, upp í valsa sem henta betur fyrir öldungana. Þar á milli örlítið pönk, nett heví metal og þjóðleg stef. Tónlistin er eftir Helga og hljóðfæraleikarana.

Yfirbragð verksins er dálítið villt. Það er að segja fantasían fær að ráða meiru en helber raunveruleiki fornaldar. Búningar verða vissulega með tilvitnun til gamalla tíma en áhersla verður lögð á glæsilegt og kynþokkafullt yfirbragð. Stuttir kjólar, bert hold, litir og glans sem allt þjónar heildarmyndinni sem er metnaðarfullt leikrit, fullt af gleði söng og dansi.

Freyvangsleikhúsið vill þakka kærlega fyrir góðar móttökur á aukasýningunni í gær til stuðnings við Jón Gunnar Benjamínsson. Einnig berum við öllum þeim sem þar mættu kærar þakkir frá Jóni Gunnari.

Freyvangsleikhúsið hefur ákveðið að efna til sérstakrar styrktarsýningar á kabarettinum “Skítt með kerfil – tökum slátur!” á fimmtudaginn 13. nóvember kl. 21:00. Allur ágóði sýningarinnar mun renna til styrktar Jóni Gunnari Benjamínssyni sem dvelur nú í Frakklandi vegna meðferðar í kjölfar slyss sem hann lenti í s.l. haust. Jón Gunnar hefur verið góður félagi í leik og starfi í Freyvangsleikhúsinu í mörg ár.
Aðgangseyrir er 1.500,- kr. Tæplega þrjúhundruð manns sáu kabarettinn um síðustu helgi og var góður rómur gerður að sýningunni. Látið ekki þetta einstaka tækifæri fram hjá ykkur fara.!
THIS IS FREYVANGUR!

Freyvangsleikhúsið vill þakka þeim hundruðum gesta sem komu á sýningar á Kabarett ’08, Skítt með kerfil – tökum slátur!, kærlega fyrir komuna. Við vonum að þið hafið skemmt ykkur jafn vel og við og vonumst til að sjá ykkur öll aftur á sýningum á Vínlandi, sem verður verkefni vetrarins hjá Freyvangsleikhúsinu. Nánari upplýsingar um það verða birtar hér á heimasíðunni á næstunni.
Takk fyrir okkur!

Þá er hún loks runnin upp, stundin sem íbúar Eyjafjarðarsveitar og nágrennis hafa beðið eftir með sívaxandi óþreyju síðast liðið ár, eða allt frá því að sýningum á Kabarett 2007 lauk síðasta haust.
Í kvöld verður Kabarett Freyvangsleikhússins 2008, Skítt með kerfil – tökum slátur!, frumsýndur í Freyvangi. Aðgangseyri er mjög stillt í hóf eða einungis kr. 1.500,- og veitingar eru innifaldar í verði. Sýningin hefst stundvíslega kl. 21:00.
2. sýning verður svo annað kvöld kl. 21:00 og að henni lokinni hefst dúndrandi dansleikur með stuðbandinu Æsir. Sérstakt tilboðsverð á þá sýningu og ball, aðeins kr. 2.500,-!
Frábær sýning fyrir alla fjölskylduna.
Grín – Ofbeldi – Blóð – Nekt!
Þúsund fílar!

Kannist þið við fólkið á myndinni?

Engin verðlaun í boði!!11!!eleven!

Kabarett ’08, Skítt með Kerfil – Tökum slátur! Glæsileg kabarettsýning í tilefni 25 ára afmælis Kabaretts. Þessi sýning hefur allt: Grín, ofbeldi, blóð, nekt! Komið því Sjón er Sögu ríkari (samkvæmt tölum úr tekjublaði Frjálsrar Verslunar).

Fjölskyldusýning föstudagskvöld 7. nóvember kl. 21:00. Kaffiveitingar og slátur innifalið í verði.

Kabarettsýning og ball laugardagskvöldið 8. nóvember kl. 21:00. Hljómsveitin Æsir leikur fyrir dansi eftir sýningu.

Vegna efnahagsástandsins hefur Freyvangsleikhúsið ákveðið að hækka ekki miðaverð frá síðasta ári. Fjölskyldusýning + veitingar á föstudagskvöld, kr. 1.500,-. Kabarettsýning + ball á laugardagskvöld, kr. 2.500,-.

Komið og njótið.

P.S. Leikarar eru minntir á æfingar öll kvöld þessa viku.

Alla þessa viku verða kabarettæfingar í Freyvangi kl. 20:00, frá mánudegi til föstudags.

Sérstök söngæfing á fimmtudag.

Þeir sem ekki syngja þurfa þó að mæta á fimmtudag, því einnig verður unnið í búningum og leikmunum.