Freyvangsleikhúsið

Af óviðráðanlegum orsökum fellur niður sýning á Memento Mori á laugardagskvöldið 24 október næstkomandi. Því verður föstudagssýningin lokasýningin  á þessu ágæta verki.

Þeir sem enn eiga eftir að sjá verkið ættu því að drífa sig á sýningu annaðkvöld.

Sýningar á Memento Mori eru í fullum gangi og nú um næstu helgi verður lokasýning,, á föstudagskvöldið 23. október, klukkan 20:30. Miðaverð er eingöngu kr 1.500,- og hægt er að panta miða í gegnum síma 857-5598, hér á síðunni er einnig hægt að panta miða undir flipanum Panta miða hér að ofan. Svo er líka hægt að nálgast miða í Pennanum – Eymundsson.

Kabarettstarfið er hægt og rólega að fara á stað, nú þegar hafa verið haldnir tveir fundir og sá þriðji verður núna á fimmtudagskvöldið næstkomandi klukkan 20:30 í Freyvangi, allir sem áhuga hafa á að vera með eru hjartanlega velkomnir.

Fyrsti fundur fyrir hinn árlega kabarett Freyvangsleikhússins verður annaðkvöld(fimmtudag) í Freyvangi klukkan 20:30. Allir áhugasamir velkomnir 🙂

Síðast liðinn föstudag var Memento mori frumsýnt fyrir fullum minni sal Freyvangsleikhússins í Freyvangi. Allt gekk að óskum og það voru ánægðir leikarar sem stigu af sviði að sýningu lokinni og skemmtu sér fram eftir nóttu í góðra vina hópi. Við þökkum öllum frumsýningargestum fyrir frábærar móttökur og hlökkum til að sjá sem flesta á sýningum á Memento mori á næstunni.

Við viljum vekja athygli á því að miðaverð er einungis kr. 1.500,- og hægt er að panta miða hér á síðunni undir flipanum Panta miða hér fyrir ofan og í síma 857 5598. Einnig að einungis verður sýnt í október þar sem stefnt er að því að sýna Kabarett 2009 fyrstu helgina í nóvember. Við hvetjum því alla til að tryggja sér miða í tíma og bendum á að þeir eru einnig seldir í Pennanum-Eymundsson. Hér má einnig sjá umfjöllun N4 um leikritið.

Þá styttist í frumsýningu á Memento Mori en frumsýning er föstudaginn 2. október kl. 20:30.  Næsta sýning er svo laugardaginn 3. október kl.20:30. Miðaverði er sérstaklega stillt í hóf eða aðeins 1.500,- kr.

Nánari upplýsingar er væntanlegar á síðuna.  Bendum á að hægt er að nálgast miða á sýninguna í Pennanum/Eymundsson Hafnarstræti. Einnig er hægt að panta miða hér á síðunni með því að smella á flipann: Panta miða hér fyrir ofan.

Aðalfundur Freyvangsleikhússins verður haldinn í Freyvangi fimmtudaginn 3. september n.k kl. 20:00. Dagskrá – hefðbundin aðalfundarstörf. Rætt um verkefni komandi leikárs. Allir velkomnir.

Freyvangsleikhúsið hefur ákveðið að taka upp á þeirri nýbreytni í ár að setja upp tvö leikverk í vetur ásamt kabarett. Hugsunin er sú að fyrir kabarett sé sett upp stykki sem er minna umfangs, tilraunakenndara og bjóði upp á meiri tilraunastarfsemi, sé e.t.v. listrænna. Að þessu sinni hefur leikritið Memento mori eftir Hrefnu Friðriksdóttur orðið fyrir valinu. Eftir sem áður verður kabarett á sínum stað og eftir jól er stefnt að hefðbundnari uppsettningu.

Memento mori var fumsýnt hjá Leikfélagi Kópavogs og Hugleik í nóvember 2004 og var valin áhugaverðasta leiksýningin á leiklistarhátíðinni Leikum núna! sem haldin var á Akureyri í júní 2005. Það var síðan valið sem framlag Íslands á NEATA-hátíðina 2006.

Í Memento mori er skyggnst inn í heim fólks sem nýtur þeirrar blessunar – eða er það bölvun? – að geta ekki dáið. Þessar ódauðlegu verur velta fyrir sér lífinu, dauðanum og ódauðleikanum, og brugðið er upp svipmyndum af fortíð þeirra. Þegar á líður koma tengsl þeirra betur í ljós og þar kemur að þær hljóta að taka afstöðu til fortíðarinnar og ódauðleikans. Leikritið er framúrstefnuleg blanda af drama og húmor, heimspekilegum hugleiðingum, rómatík og fáránleika.

Í verkinu eru 8 – 9 hlutverk, jafnt fyrir karla og konur. Þeir sem hafa áhuga á að vera með eru vinsamlega beðnir um að mæta í Freyvang á eftirtöldum tímum:

miðvikudag 26. ágúst kl. 20:00 – 1. samlestur

fimmtudagur 27. ágúst kl. 20:00 – 2. samlestur

laugardagur 29. ágúst kl. ? – Hlutverkaskipti og skipulag.

Fyrirhugað er að hefja æfingar mánudaginn 31. ágúst og æfa út septembermánuð. Áætluð frumsýning er föstudaginn 2. október.

Hér má lesa leikdóm um sýningu Leikfélags Kópavogs og Hugleiks

Frekari umfjöllun um leikritið má finna hér

Eins og fram hefur komið var sýning Freyvangsleikhússins á rokksöngleiknum Vínlandi eftir Helga Þórsson í leikstjórn Ólafs Jens Sigurðssonar valin athyglisverðasta áhugaleiksýningin 2008 – 2009. Freyvangsleikhúsinu var því boðið að setja verkið upp í Þjóðleikhúsinu 12. júní s.l.

Það var rafmagnað andrúmsloft í þéttsetnum sal Þjóðleikhússins þegar sýningin hófst og leikarar stigu á stokk til að láta ljós sitt skína. Um leið og leikurinn hófs var sem allt óöryggi liði úr mannskapnum og óhætt að segja að allir hafi átt stjörnuleik þetta kvöld. Áhorfendur hlógu mikið og klöppuðu eftir hvert atriði og hvert lag. Í lokin voru það harla ánægðir leikarar og örþreyttir sem voru klappaðir tvisvar upp í Þjóðleikhúsinu þetta kvöld og gleðin fölskvalaus þegar allir áhorfendur risu sem einn maður á fætur og héldu dynjandi lófatakinu standandi áfram uns ljósin slokknuðu og leikarar drifu sig af sviðinu.

Eftir sýninguna bauð Þjóðleikhússtjóri, Tinna Gunnlaugsdóttir, hópnum upp á kampavín og gos á sviðinu og margir fremstu leiklistarfrömuða landsins, sem voru á sýningunni, hrósuðu Freyvangsleikhúsinu í hástert fyrir fagmannlega sýningu, vel unna og umfram allt ákaflega skemmtilega.  Að þessum fagnaði loknum var haldið í Þjóðleikhúskjallarann þar sem Helgi og hljóðfæraleikararnir héldu tónleika og skemmtu leikurum og gestum fram eftir nóttu.

Þess ber að geta að sýningin fékk fjórar stjörnur og mikið lof í umjöllun Morgunblaðsins mánudaginn 15. júní.

Við viljum þakka öllum sem komu að uppsetningu þessa verks kærlega fyrir samstarfið, án ykkar hefði þessi glæsilegi árangur aldrei náðst. Einnig viljum við þakka áhorfendum fyrir komuna og hlý orð í okkar garð. Svo má ekki gleyma að þakka Sigga Hall fyrir frábæran mat í Þjóðleikhúsinu.

Sýning Freyvangsleikhússins, rokksöngleikurinn Vínland, var valin athyglisverðasta áhugaleiksýning 2009 af dómnefnd Þjóðleikhússins. Af því tilefni verða 2 aukasýningar í Freyvangi 4. og 5. júní n. k. kl. 20:00 báða dagana. Nemendum 7. til 10. bekkjar Hrafnagilskóla er boðið að koma og sjá sýninguna fimmtudaginn 4. júní. ATH. allra síðustu sýningar “hérlendis”. Á þessum sýningum, sem og í Þjóðleikhúsinu, munu Helgi og hljóðfæraleikararnir leika undir ásamt Ingólfi Jóhannssyni.

Miðasala í Freyvangi við innganginn kr. 1.500.-frítt fyrir 12 ára og yngri. Athugið að ekki eru hallandi áhorfendapallar í húsinu á sýningunum í Freyvangi, en þeim mun meiri halli er á áhorfendapöllum Þjóðleikhússins þann 12. júní á hátíðarsýningu leikhússins á VÍNLANDINU. Miðasala í Þjóðleikhúsinu á http://leikhusid.is.

Umfjöllun Þjóðleikhússins sem og umsögn dómnefndar má sjá hér.

Þökkum frábæran stuðning og góð orð í okkar garð, stjórn Freyvangsleikhússins

Á bandalagsþingi Bandalags íslenskra leikfélaga sem haldið var í Hlíð í Ölfusi 1. – 2. maí var tilkynnt um val Þjóðleikhússins á athyglisverðustu áhugaleiksýningu leikársins 2008 – 2009 og varð sýning Freyvangsleikhússins, Vínland, fyrir valinu að þessu sinni, eins og lesa má á vef bandalagsins.

Í umsögn dómnefndar Þjóðleikhússins segir:

“Það er hreint út sagt frábær hugmynd hjá Helga Þórssyni og Freyvangsleikhúsinu að setja á svið rokksöngleik byggðan á víkinga-arfleifð okkar Íslendinga. Helgi Þórsson er aðalhugmyndasmiður þessarar sýningar, sem höfundur tónlistar, texta og útlits sýningarinnar, en er dyggilega studdur af kraftmiklum hópi leikara, tónlistarfólks og allra annarra sem til þarf að gera svona stórsýningu að veruleika. Úrvinnslan á menningararfi okkar var mátulega hátíðleg, og á köflum bráðsniðug. Stór hópur leikara kemur að sýningunni, og nýtur sín vel í söng og leik, og eru sum tónlistaratriðanna afar áhrifamikil. Er þar þáttur tónlistarstjórans, Ingólfs Jóhannssonar, ekki lítill, en tónlistarflutningur er í höndum hljómsveitarinnar Helgi og hljóðfæraleikararnir. Mikið er lagt í leikmynd og búninga og þar er ólíkum stílum stefnt saman á djarfan hátt, svo hetjur víkingatímans birtast okkur eins og þúsund ára gamlar rokkstjörnur. Frumleiki, hugmyndaauðgi og kraftur einkenna þessa skemmtilegu sýningu.”

Tilkynningu Þjóðleikhússins má lesa í heild hér.

Í dómnefnd í ár sátu Melkorka Tekla Ólafsdóttir, leiklistarráðunautur Þjóðleikhússins, Vigdís Jakobsdóttir, deildarstjóri fræðsludeildar Þjóðleikhússins og Tinna Gunnlaugsdóttir þjóðleikhússtjóri.

Freyvangsleikhúsið þakkar þann heiður sem því er sýndur með þessu vali og lofar að launa fyrir sig með stórkostlegri sýningu á rokksöngleiknum Vínlandi í Þjóðleikhúsinu þann 11. júní n.k.