Category: Uncategorized

Kæru vinir.

Því miður sjáum við okkur ekki annað fært en að fella niður sýninguna, sem átti að vera kl. 14 í dag, vegna veðurs.

Það eru mörg börn og ungmenni sem leika í sýningunni okkar, ásamt því að stærstur hluti áhorfenda okkar eru börn. Við hjá Freyvangsleikhúsinu viljum ekki taka neinar áhættur með að fólk sitji fast í kuldanum með krakkana, svo að það verður ekki sýning í dag.

Við mælum frekar með því að fólk nýti daginn í að liggja undir teppi með heitt kakó og bíða eftir jólunum.

Haft verður samband við alla þá sem áttu pantaða miða í dag og þeim boðið að koma á morgun í staðinn.

Endilega hafið samband við miðasölu í síma 857-5598 fyrir frekari upplýsingar.

 

Kæru vinir!

Þann 24. október síðastliðinn frumsýndum við fjölskyldusýninguna Klaufar og kóngdætur við mjög góðar undirtektir.

Meðal frumsýningargesta voru þau Íris Ólöf Sigurjónsdóttir og Hjörleifur Hjartarson, en eftir sýninguna skrifuðu þau gagnrýninina hér að neðan og gáfu okkur fullt leyfi til að nota hana að vild.

Við þökkum Írisi og Hjörleifi kærlega fyrir komuna og fyrir hlý orð í okkar garð.

Freyvangsleikhúsið frumsýndi Klaufa og kóngsdætur eftir þá Sævar Sigurgeirsson, Ármann Guðmundsson og Þorgeir Tryggvason þann 24. október sl. Leikurinn er borinn upp af kornungum leikurum sem margir hverjir hafa tekið þátt í leikuppfærslum á Akureyri,m.a. leikið engla í Gullna Hliðinu og búið sér sjálf til vettvang til leiklistar þegar því er að skipta. Auk þeirra skipa eldri og reyndari leikarar stór hlutverk í sýningunni og ljá henni þá þyngd og festu sem nauðsynleg er. Þessi samsetning leikhópsins er e.t.v. lýsandi fyrir starfsemi Freyvangsleikhússins sem hefur haldið dampi lengur og betur en flest áhugafélög, verið listrænn farvegur fyrir bæði reynslubolta og byrjendur á leiksviði og sett upp hverja metnaðarfullu leiksýninguna á fætur annari. Freyvangsleikhúsið vílar ekki fyrir sér að ráðast í gríðarlega metnaðarfull verkefni og hefur m.a. oftlega séð Norðlendingum fyrir barna- og fjölskylduleikhúsi sem tilfinnanlega hefur skort í leikhúslíf Akureyrar.

Leikritið Klaufar og kóngsdætur hlaut grímuverðlaunin sem barnaleikrit ársins árið 2005 og þarf engan að undra því það er vel og fallega saman sett af ljótu hálfvitunum þrem; Ármanni, Sævari og Þorgeiri. Við veltum raunar fyrir okkur á heimleiðinni hvers vegna þessi snillimenni væru ekki hreinlega á launum hjá leikhúsum borgarinnar við að skrifa barnaleikrit. Ármanni Guðmundssyni leikstjóra eru vissulega hæg heimatökin að stjórna eigin verki en á móti er þar nokkur aðstöðumunur að hafa ekki brúðuleikhús við hendina og allar þær töfralausnir sem Þjóðleikhúsið hefur upp á að bjóða. Ármann hefur unnið fábært starf með þessum unga leikhópi og nýtt sér út í æsar þá hömlulausu leikgleði sem þarna svífur yfir vötnum.

Sýningin er mikið hópverkrefni og engin leið eða ástæða til að staldra við frammistöðu einstakra leikara sem flestir voru í mörgum hlutverkum. Ekki verður þó annað hægt en að minnast á þann sem aðeins lék eina persónu þ.a.s. Valdimar Gunnarsson í hlutverki ævintýraskáldsins H. C. Andersens.Hann dúkkaði upp með jöfnu millibili með sínum fallega talanda og náði einstaklega vel að vera sú góðlátlega þungamiðja sem öll ævintýrin hverfðust um.

Búningar og lýsing og leikmynd undirstrikuðu ævintýrablæinn.
Búningarnir voru í hressilegum litum og margt þar snilldarlega gert s.s. kórónur úr plasthnífapörum og smádóti úr ýmsum áttum. Þessi litskrúðugi öskudagsstíll gat þó á köflum verið full sundurgerðarlegur til að þjóna frásögninni í leikritinu. Tónlistarflutningurinn í höndum hinna ungu leikara var e.t.v. nokkuð hikandi á frumsýningunni. Tónlistin skipar veigamikinn sess og textarnir eru dásamlegir eins og vænta mátti af höfundum.

Að frátöldum þesssum sparðatíningi er óhætt að segja að sýning Freyvangsleikhússins á Klaufum og kóngsdætrum sé hreint dásamleg fjölskylduskemmtan eins og heyra mátti á hlátrasköllum ungra sem aldinna á frumsýningunni. Sýningin er enn ein rós í hnappagat Freyvangsfólks sem lætur sér annt um ungdóminn bæði í hópi áhorfenda og þá nýju kynslóð leikara sem þarna fær tækifæri til að skapa og þroskast í félagsskap þeirra sem eldri eru.

Við mælum svo sannarlega með þessari ágætu fjölskylduskemmtun. Gleðin hefur völd og við hlógum dátt þessa kvöldstund í Freyvangsleikhúsinu.

Íris Ólöf Sigurjónsdóttir

Hjörleifur Hjartarson

Kæru vinir.

Um helgina frumsýndum við fjölskyldusýninguna Klaufar og kóngsdætur við frábærar undirtektir. Frumsýningin fór alveg eins og frumsýning á að fara; fullt hús, mikið hlegið, mikið klappað og allir rosalega kátir.

Sérstaklega þótti okkur skemmtilegt að sjá og heyra hvað börnin höfðu gaman af, og undir lok sýningar voru þau mörg komin dáleidd við sviðbrúnina.

Við hjá Freyvangsleikhúsinu erum bæði ánægð og stolt af sýningunni okkar. Og við hlökkum til að sjá ykkur sem flest um komandi helgar.

Hægt er að panta miða í tölvupósti á netfangið freyvangur@gmail.com, í skilaboðum á Facebook síðu okkar og í síma 857-5598. Miðasalan er opin kl. 17-19 virka daga og 10-13 um helgar.

Kæru vinir.
Nú styttist óðfluga í frumsýningu hjá okkur á fjölskyldusýningunni Klaufar og kóngsdætur. Bráðskemmtilegt verk þar sem nokkur af verkum H.C. Andersen mætast á fjölunum, og auðvitað lætur sagnasmiðurinn sjálfur sig ekki vanta.

Kæru félagar.

Nú fer fjörið að hefjast hjá Freyvangsleikhúsinu og það stefnir í æsispennandi vetur hjá okkur.

Fyrsta verkefnið okkar í vetur verður uppsetning á leikritinu Klaufar og kóngsdætur. Leikritið er einstaklega skemmtilegur samtíningur af ævintýrum eftir H.C. Andersen, sem er þekktur höfundur á öllum heimilum. Verkið er skrifað af þrem Ljótum hálfvitum, þeim Ármanni Guðmundssyni, Sævari Sigurgeirssyni og Þorgeiri Tryggvasyni, ásamt því að vera með tónlist eftir þá félagana.

Ármann mun einnig leikstýra uppsetningunni.

Samlestrar verða núna um helgina, laugardaginn 5. september og sunnudaginn 6. september, kl. 14:00 báða dagana. Verður þá lesið í gegnum leikritið málin rædd.

Við viljum hvetja alla sem hafa áhuga á að taka þátt, hvort sem er á sviðinu eða utan þess, að láta sjá sig.

Einnig viljum við benda á að aðalfundur félagsins verður haldinn miðvikudaginn 9. september kl. 20:30. Allir áhugasamir hvattir til að mæta og taka þátt í umræðum.

 

Hlökkum til að sjá sem flesta, hvort sem er á aðalfundi eða samlestri.

Stjórn Freyvangsleikhússins

Kæru vinir.

Íbúar Anatevka kveðja leiksviðið með gleði og söknuði, en öll góð ævintýr þurfa einhvern enda að hafa.
Við þökkum fyrir frábærar viðtökur í vetur og óskum ykkur fallegs og góðs sumar.
Sjáumst svo hress og kát næsta vetur.
Takk kærlega fyrir okkur.
Mazeltov!

Ljósmynd: Ármann Hinrik